Mia Penso - Luiz Lazaro Zamenho
Sur la kampo for de l' mondo,
antauh nokto de somero,
amikino en la rondo
kantas kanton pri l' espero.
Kaj pri vivo detruita
shi rakontas kompatante,
mia vundo refrapita
min doloras resangante.
"Chu vi dormas? Ho, sinjoro,
kial tia senmoveco?
Ha, kredeble rememoro
el la kara infaneco?"
Kion diri? Ne ploranta
povis esti parolado
kun frauhlino ripozanta
post somera promenado!
Mia penso kaj turmento,
kaj doloroj kaj esperoj!
Kiom de mi en silento
al vi iris jam oferoj!
Kion havis mi plej karan
la junecon mi ploranta
metis mem sur la altaron
de la devo ordonanta!
Fajron sentas mi interne,
vivi ankauh mi deziras,
io pelas min eterne,
se mi al gajuloj iras...
Se ne plachas al la sorto
mia peno kaj laboro
venu tuj al mi la morto,
en espero sen doloro!